Monday, May 26, 2014

തിരിച്ചറിയപ്പെടുന്നത്....

കൂടെകിടന്നവനേ രാപ്പനി അറിയൂ എന്നൊക്കെ ചുമ്മാ പറയുകയാണ്. 

ഇത്തവണത്തെ തെരഞ്ഞെടുപ്പില്‍ മോദി അധികാരത്തിലെത്തിയത് ഒരുതരത്തില്‍ അനുഗ്രഹമാണെനിക്ക് .കൂട്ടുകാരില്‍ പലരും ആരാണെന്നും എന്താണെന്നും മനസ്സിലാക്കി തന്നത് ഈ തെരഞ്ഞെടുപ്പാണ്.നേരിട്ട് ബന്ധമുള്ളവര്‍ മുതല്‍ ഫേസ്ബുക്കിലുടെ കണ്ടുപരിചയപ്പെട്ടവര്‍ വരെ ഇക്കൂട്ടത്തിലുണ്ട്.

എത്രയോ സ്‌നേഹത്തോടെയും ബഹുമാനത്തോടെയും പെരുമാറിയിട്ടും കണ്ടുപരിചയപ്പെട്ടും, ഒരു പായയില്‍ ദിവസങ്ങളോളം അന്തിയുറങ്ങിയിട്ടും എനിക്ക് കാണാന്‍ പറ്റാത്ത ഒരു വിരോധ മനസ്സ് (മതമാകാം) എന്റെ കൂട്ടുകാര്‍ക്ക് ഉണ്ടായിരുന്നു എന്നു ഞാനിപ്പോള്‍ തിരിച്ചറിയുന്നത് ഈ തെരഞ്ഞെടുപ്പിലൂടെയാണ്. ഉള്ളില്‍ വിരോധം വെച്ച് അവരിപ്പോള്‍ പുറമെ ചിരിക്കുകയാണെന്ന് മനസ്സിലാക്കുന്നു. ചോറു തന്ന കൈക്ക് ഒരു കമ്മിറ്റ്‌മെറ്റ് തോുന്നുകയൊക്കെ സ്വാഭാവികമാണ്. തിരിച്ച് ഒന്നും പ്രതീക്ഷിക്കാന്‍ പാടില്ലല്ലോ.....എങ്കിലും...

പുറമെ വിപ്ലവം പറഞ്ഞ് നടക്കുന്ന മറ്റു ചില സുഹൃത്തുക്കളെയും തിരിച്ചറിയാനായി.ആ വിപ്ലവ വാക്യങ്ങളെല്ലാം വെറും ഉപരിപ്ലവമായിരുന്നൂ .മോദി അധികാരത്തിലെത്തിയപ്പോള്‍ ഉള്ളില്‍ ചിരിവരുന്നുണ്ട് അവര്‍ക്കും.കഴിഞ്ഞ ദിവസം ഒരു സുഹൃത്ത് സഖാവ് അഭിമാനപൂര്‍വം കൈയിലെ ചരട് ഉയര്‍ത്തി കാണിച്ച് പറഞ്ഞു.ഇനി മോഡിയുടെ കാലമാണ്. ഇതൊക്കെയുണ്ടായാലും അവരെയെനിക്ക് ഒഴിവാക്കാന്‍ പറ്റില്ലല്ലോ....ഓരോരുത്തര്‍ക്കും അവരുടെ മതമുണ്ട്.രാഷ്ട്രീയമുണ്ട്.ലക്കും ദീനുകും വലിയ ദീന്‍.........

Thursday, May 8, 2014

മാതൃഭാഷ അടിച്ചേല്‍പ്പിക്കണോ?

your good name please ?
Akbar Ali.
Why don't you know Urudu ?
അതിനെനിക്ക് മറുപടിയില്ല.
ബാംഗളൂരുവില്‍ പാഠനാവശ്യാര്‍ഥം ഒരു വര്‍ഷം കഴിയവെ സുഹൃത്ത് ഖാസിം ചോദിച്ചപ്പോളാണ് മതവും ഭാഷയും തമ്മില്‍ ഇങ്ങനെയൊരു ബന്ധമുണ്ടെന്ന് എനിക്ക് മനസ്സിലായത്.
കന്നട ഔദ്യോഗിഗ ഭാഷയായിട്ടുള്ള കര്‍ണ്ണാടകത്തില്‍ നല്ലൊരു ശതമാനം മുസ്്‌ലിംങ്ങളും ഉറുദു ഭാഷയാണ് സംസാരിക്കുന്നത് എന്നാണ് അറിയാന്‍ കഴിഞ്ഞത്.എന്നാല്‍ കേരളത്തില്‍ ഭാഷക്ക് ഇത്തരമൊരു വേര്‍തിരിവില്ലല്ലോ....

സ്വാഭാവികമായും സുപ്രീംകോടതിയുടെ വിധിയെ  ഈ ഒരു പരിപ്രേക്ഷ്യത്തില്‍ വിലയിരുത്തിയാല്‍ ഇന്ന് മാതൃഭാഷ ബോധനം അടിച്ചേല്‍പ്പിക്കണമെന്ന വാദത്തെ പിന്തുണക്കാനാവില്ല.അറിഞ്ഞിടത്തോളം കര്‍ണ്ണാടക,തമിഴ്‌നാട് പോലുള്ള സംസ്ഥാനങ്ങളില്‍ അവരുടെ ഔദ്യോഗിഗ ഭാഷയായ തമിഴും,കന്നട ഭാഷയിലൂടെയും മാത്രം പഠനം നടക്കണമെന്ന് സര്‍ക്കാറുകള്‍ തീരുമാനിച്ചാല്‍ അത് ഭാഷാ ന്യൂനപക്ഷങ്ങള്‍ക്ക് പ്രയാസകരമായിരിക്കും.

മാതൃഭാഷയിലൂടെയുള്ള പഠനം മാത്രമെ ശരിയാകൂ എന്ന കര്‍ക്കശ നിലപാട് അംഗീകരിക്കുമ്പോള്‍തന്നെ മറ്റു ചില വസ്തുതകളും നമ്മള്‍ വിലയിരുത്തേണ്ടതില്ലേ.നിലവിലുള്ള അക്കാദമിക മുന്നേറ്റത്തില്‍ മാതൃഭാഷയിലൂടെ നമുക്ക് എത്ര മുന്നേറാനാകും.?
പത്താം തരം വരെ മലയാള മാധ്യമത്തില്‍ പഠിച്ചവര്‍ക്ക് പ്ലസ് വണ്‍ മുതല്‍ ഉന്നത വിദ്യാഭ്യാസ രംഗത്ത് ഈ ഭാഷവെച്ച് എന്ത് ചെയ്യാനാകും.?ഉന്നത വിദ്യാഭ്യാസത്തിനും, അഭിമുഖങ്ങള്‍ക്കുമെല്ലാം ഇംഗ്ലീഷ്‌പോലുള്ള ഭാഷകള്‍ അനിവാര്യമായ ഒരു കാലത്തല്ലേ നമ്മള്‍ ജീവിക്കുന്നത്.

ഇംഗ്ലീഷ് മാധ്യമത്തില്‍ പഠിച്ച് മുന്നേറിയവരുടെ മാതൃ ഭാഷാപ്രേമത്തില്‍ ബലിയാടുകളാകുന്നതു എന്നും ഇവിടുത്തെ
ഏറ്റവും സധാരണക്കാരാണ്.പഠിച്ച് മുന്നേറിയിട്ടും ഒരു ജോലി കണ്ടെത്താന്‍ അന്യ സംസ്ഥാനങ്ങളിലേക്കും വിദേശ രാജ്യങ്ങളിലേക്കും പോകുന്ന മലയാളിയെ സംബന്ധിച്ചിടത്തോളം ഈ ഭാഷകൊണ്ട് എന്ത് പ്രയോജനമാണുണ്ടാക്കുന്നത്.കൂടാതെ ഉന്നത വിദ്യാഭ്യാസ രംഗത്തും നമുക്ക് മലയാള ഭാഷ സൗകര്യങ്ങളില്ലല്ലോ......

Friday, May 2, 2014

പരീക്ഷാ ഫലങ്ങള്‍

നമ്മുടെ പരീക്ഷാ ഫലങ്ങളും ഉത്തരകടലാസുകളും സുതാര്യമാകേണ്ടിയിരിക്കുന്നു.അരീക്കോട് സംഭവം പോലോത്തത് ആവര്‍ത്തിക്കാതിരിക്കാന്‍ നമുക്കും ചിലത് ചെയ്യാനാകും.ഒരു തരം സോഷ്യല്‍ ഓഡിറ്റിംഗ്.പരീക്ഷയില്‍ മനപൂര്‍വം തോല്‍പ്പിച്ചും ക്രഡിറ്റിന് വേണ്ടി മാര്‍ക്ക് വാരിക്കോരി എപ്ലസ് ഉണ്ടാക്കിയതും പരിശോധിക്കാന്‍ നമ്മുടെ മുന്നില്‍ സംവിധാനമുണ്ട്.
വിവരാവകാശനിയമം ഒരു ഉദാഹരണം മാത്രം.

കുട്ടി എഴുതിയ ഉത്തരപേപ്പറുകളുടെ സാക്ഷ്യപ്പെടുത്തിയ പകര്‍പ്പ് വിവരാവകാശ നിയമപ്രകാരം തേടാവുന്നതാണ് .ഉത്തരം നല്‍കാന്‍ അധ്യാപകന്‍ മാനദണ്ഡമാക്കിയ ഉത്തര സൂചികയുടെ പകര്‍പ്പും തേടാം.അപ്പോള്‍ അറിയാം.സംഗതി എന്തൊക്കെയാണ് നടക്കുന്നതെന്ന്.മോഡല്‍ പരീക്ഷയിലെ മൂല്യനിര്‍ണ്ണയവും എസ്എസ്എല്‍സിയിലെ മൂല്യനിര്‍ണ്ണയവും എല്ലാം ശേഖരിച്ചാല്‍ പല എപ്ലസിന്റെയും രഹസ്യങ്ങള്‍ അറിയാനും സാധിക്കും.

അധ്യാപകരുടെ ടീച്ചിംഗ് മാന്വല്‍ ഉള്‍പ്പടെയുള്ളവ ഇത്തരത്തില്‍ ഒരു വിവരാവകാശ പരിശോധന നടത്തിയാല്‍ നമ്മുടെ പൊതുവിദ്യാഭ്യാസം മാത്രമല്ല എല്ലാ വിദ്യാഭ്യാസ സബ്രദായവും കുറെയൊക്കെ രക്ഷപ്പെടുമെന്ന് തോന്നുന്നു